Dadap I Taru Sakti (bhs.Bali)

Bali post,  28-10-2012.

Krama Hindune ring Bali sampun janten pastika nenten lepas saking kawentenan taru dadap. Taru sane lumrah kewastanin taru sakti puniki, saking taru, daun/don, kantos kemuncuk (tunas) dahat kawigunayang olih krama Hindune. Kewastanin taru sakti santukan taru (batang) saking taru dadap prasida tumbuh muncuk anyar (tunas baru), yadiastun bongkol tarune nenten nganteg tanah utawi ketanem.  Taru dadap sane medue aran latin “ erythrinae folium”  prasida tumbuh sawatara 15 ngantos 20 meter. Kulit taru sane kantun nguda  madue kulit sane halus tur medaging garis mewarna gadang, abu-abu, coklat nguda, utawi putih.  Ring tarunyane lumrah medaging dui-dui alit. Manut peneltian sane sampun kelaksanayang olih sekatah ilmuwan, daun dadap medue komposisi alkaloid, eritradina, eritrina, eritramina, hipaforina, miwah erisovina. Daun dadap medue rasa sane pait, madue sifat ngetisin, tur prasida pinaka pembersih darah/rah.

Ring Bali wenten makudang-kudang soroh taru dadap, minakadi dadap oong/wong, dadap canging, miwah dadap tis. Dadap oong medue cihna tarunyane sane medui, tur nenten dados keanggen sarana upakara. Dadap canging medue wentuk sekadi dadap tur taler medui,taler nenten dados keanggen serana upakara, nanging prasida keanggen sayur pinaka tamba penurun tensi, utawi tamba saking jantung. Dadap sane lumrah keanggen sarana upakara olih krama Hindune wantah dadap tis. Yening selehin indik kewentenan taru dadap ring widang pengobatan , taru dadap medue makudang-kudang kawigunan, inggih punika pinaka tamba cacingan, utawi desentri, rematik, sungkan ring weteng, kebus dingin, nepasin kruron (keguguran), melancarkan ASI, miwah nifas ring ibu-ibu sane wusan ngembasin putra.

Nenten wantah ring widang pengobatan, taru dadap sering keanggen olih krama Hindune pinaka pengawit mekarya sanggah, utawi kewastanin Sanggah Turus Lumbung. Sanggah Turus Lumbung inggih punika sanggah sane kekaryanin antuk turus taru dadap pinaka saka, tur kedagingin ulatan pering pinaka genah ngenahang sesajen utawi wewantenan. Makeh kramane ngangge taru puniki santukan kapercaya pinaka taru sakti. Krama sane durung medue merajan utawi sanggah pepaetan /taru mati, mesti nganggen taru dadap pinaka saka (tiang), sane keparcaya pinaka pengastiti Ida Batara Hyang Guru. Daun/don sane mentik saking taru punika keanggen pinaka tepung tawar  (sarana upakara) , tur muncuk (tunas) saking taru punika keanggen pinaka sarana ngetisin tirta ring wewantenan, miwah pemedek ring sajeroning pemargin yadnya. Taru dadap medue filosofis pinaka taru pemarisudha. Sanggah turus lumbung  kewangun abosbos, tur raris kagentosin antuk wewangunan sane tetep (permanen), nganutin kesanggupan sane nuenang. Sesampune sanggup, wawu raris kagentosin antuk wewangunan pepaetan/ taru mati.