PRABU WATUGUNUNG

satua mebasa Bali

Ida Sang Prabu Watugunung nyakrawerti ring panegara Gilingwesi.  Ida Sang Prabu madue istri prami kekalih, dahating ayu angayang-ayang, waluya ngasorang  keayuan para widiadarine ring suarga loka. Sane kapertama mapesengan Dewi Sinta, sane kaping kalih mapesengan Dewi Landep. Ida Sang Prabu Watugunung wiakti prabu wubuhing bala tur dahating mawisesa. Ida Sang Prabu Watugunung madue putra pitu likur diri luih-luih. Pesengan putran idane soang-soang inggih punika : Ukir, Kulantir, Tolu, Gumbreg, lan selanturnyane ngantos dukut. Maka sami putrane punika embas mebiang asiki, inggih punika saking dewi Sinta.

Kacarita ri sada kala, sedawege Ida Sang Prabu Watugunung merem ring bale-balene, gelung kaprabonane sampun kegenahang. Duk punika Ida Dewi Sinta pastika pisan polih ngaksiang prabun ida sang prabu wiakti wenten pecak kanin rahat, biket ageng. Seantukan kawentenan sekadi punika, Ida Dewi Sinta murunang matur pitaken. Ida Sang Prabu Watugunug parama ledang nguningayang separiindikan idane, kebaos sedaweg ida sang prabu kantun alit, ida wantah anak alit sane kalintang kual. Antuk kekualan idane punika, sedaweg biange nulek ngledokang titisan antuk siut, santukan biangne kapuhan antuk panes turmaning raris Ida Sang Watugunung Alit macara, kandugi biangne duka. Ida Sang Watugunung raris prabune kabeet antuk muncuk siut ajengane, kandugi ngamedalang rah akueh. Antuk punika anake alit raris salit arsa, raris nilar raga, nilarin genah biangne. Murang-murang lampah, saparan-paran lakune. Riwau asapunika Ida Sang Prabu Watugunung macarita, dahating tengkejut Dewi Sinta mirengang daging carita ida Sang Prabu Watugunung. Blegbegan engsek pikayunane abosbos. Dewi Sinta eling ring kawentenan punika, wiakti polih sehasa ngetok prabun okane antuk siut turmaning okane ical nenten prasida katutan rauh mangkin. Indika punika pastika sampun sekadi sane kaceritayang antuk ida sang prabu. Rasa sedih tan ambat-ambat, agung dosa tan sinipi, yening kapikayun-kayunin ngansan enek nganinin ulun angen. Mariselsel raga, dados anak istri kanggen rabi antuk i anak. Antuk punika Dewi Sinta ngrincikang naya upaya, mangda prasida mapalasan, tur nenten malih kewawa dados istrin Sang Prabu Watugunung.

Santukang Ida Sang Prabu Watugunung miarsayang kawentenane sekadi sepi abosbos, punika mawinan ida mataken, punapi ngawinang Dewi Sinta dados meneng. Antuk punika Dewi Sinta nenten kirang naya, nganikayang sane wenten ring pikayun wantah nenten wenten sios ida wiakti angob ring keagungan kalih kawisesan Ida Sang Prabu. Sakewanten, sekadi atur Ida Dewi Sinta, Ida Sang Prabu Watugunung yadiastun wirya sakti, durung prasida ngasorang suargane tur durung molihang rabi widiadari saking suargan. Manut pikayunan Ida Dewi Sinta, yening Ida Sang Prabu ngelamar widiadari ring suargan, janten pacang wenten yuda, ida sang prabu pacang kaon, tur pastika sampun Ida Sang Prabu Watugunung sane ngewawa ragan idane pacang newata. Punika anggen jalaran mapasahan sareng Ida Sang Prabu Watugunung

Dikutif dari >> bhuana sari 2010.