Paribasa Bali (wantah akedik pisan)

Sasonggan, sasonggan mawit saking kruna “ungguh” genah, linggih, raris polih pangiring an, daddos ungguhan mateges janji utawi pati. Kruna ungguhan kasandiang  dados unggwan, kasuwen-suwen kruna unggwan, kaucapang unggan polih pengater sa dados saunggan, kesandiang dados songgan. Kruna songgan kedwipurwayang dados sesonggan. Raris sesonggan punika keangge pelambang kalih polah jadma sane kaimbangang ring kahanan kalih polah  barang utawi buron, upami  : buka taluhe apit  batu, sukseman ipun : sekadi jadmane sane ngarepin kawentenan sami sulit, pelih akidik bisa nemu baya/sengkala

Peparikan, kruna peparikan mawit saking kruna pari, sane meteges padi polih paneen suara  -k  dados parik. Polih pangiring an dados parikan. Kadwipurwayang dados paparikan. Paparikan mapiranti antuk petang palet dados acarik , saha mawirama tur nganggo kanti suara. Kalih palet dados giing (sampiran) sane kalih palet dados daging (arti), upami:

Bungan tuung bungan medori

Biu kayu di banjar petang

Tiang buung ngenyakin beli

Beli liu ngelah utang

Bladbadan, kruna bladbadan mawit saking kruna badbad sane mateges aud, meserod. Dados nyane kruna bladbadan meteges lengkara sane keaud-audang, keanggen nediah/nyindir  utawi nyritayang keneh sang ngomongang. Upami > Nyelaka kuning = emas, kaaud-audang  dados ngemasin

Wewangsalan, kruna wewangsalan mawit saking kruna wangsal sane meteges bangsal, kadwipurwayang muah polih pangiring an dados wewangsalan, sane medaging arti/teges dediah/sindiran keanggen nediahin/nyindir. wewangsalan wenten kalih soroh : 1. Wewangsalan sane ngangge duang (2) garis  (pantun 2 seuntai).  2. Wewangsalan sane ngangge petang (4) garis (pantun 4 seuntai) Contonyane :  biu dak biu batu, ia bedak nganggon mantu

Sesenggakan, kruna sesenggakan mawit saking kruna  senggak polih pengiring an muah kedwipurwayang dados sesenggakan, wigunan ipun kaanggen  nediahin/nyindir , upami : buka bedake suginin (maan silap-silap dogen) artin nyane : sekadi jadmane truna mademenan ngajak anak istri, nanging lacur lantas kalahina nganten ngajak truna lenan.

Seswangan, kruna sesawangan mawit saking kruna sawang, meteges inda (pinda), polih pangiring an tur kedwipurwayang dados sesawangan. Sesawangan punika kruna kruna sane medaging pepindan utawi pengumpamaan keluiwan utawi kejelekan keanggen bebanding ring jagate. Lumrah nyane sesawangan punika kekawitin antuk kruna : buka, sekadi, angganing, muah alah. Upami :  kukune ngredep kadi manik banyu (melah), seledetan iluhe tajep kadi tatit (melah)

Sesapan, kruna sesapan mawit saking kruna sapa, meteges pariindik ngorahin, metaken, utawi nyapa. Daging nyane akehan metetujon nunas ica ring Ida Sanghyang Widhi, utawi marep ring roh-roh halus  nunas kerahayuan . upami : Yening ngajak anak cerik meleluasan, miken mejalan patutne iraga ngolesang adeng jalikan  di gidat rarene utawi disikun kupingne sambilang ngucapan sesapan : “Ratu Bhatara Brahma tiang nunas pasikepan mangda rahayu raren titiange ring margi”

Sumber (dipetik) : buku sari paribasa bali, i ketut sueka S.Pd