Taru Sorga (bahasa Bali dan Hindu)

Bali post, 021212

Bingin, inggih punika sarwa punyan-punyanan.Soroh taru-taruan ageng sane punyannyane pinih ageng tur angker. Kebaos angker majeng kerama Bali, seantukan dados keanggen serana ring sakatah dudonan upacara agama umat Hindu. Lianan punika kebaos anggker riantukan kesengguh sarwa buta-buti ngijeng ring punyan taru bingin, tumbuh nyane nenten ngawag, bingin pacang tumbuh ring genah suci utawi pura.  Taru bingin akeh kawigunannyane, sejabaning punyannyane ageng ngawinang dayuh, kulit miwah donnyane taler meguna, lumrah kawigunayang sarana ring upacara adat miwah sarana upakara. Kawentenan bingin, kebuatang pisan pinih utama rikala upacara pengabenan, santukan ring pemargin pengabenan wenten upacara kewastanin ngangget don bingin.

Yening kerereh makna tur tetujon upacara puniki manut buku terbitan Pustaka Bali Post sane kasurat olih Ida Rsi Bhujangga Waisnawa  Putra Sara Shri Sathya Jyoti sajeroning bukun nyane “ Ngajum sekah lan ngangget don bingin” ketlatarang, Ngangget don bingin mawit sakit karuna ngangget, don, miwah bingin. Ngangget sajeroning bahasa Bali tegesnyane ngimpuk utawi ngalap nganggen tungguan kejangkepin tiuk. Don mawit saking bahasa Bali, daun molihang sanditasi dados don. Yening bingin, sampun meteges “punyan bingin” wantah taru pinih ageng taler kesengguh silih sinunggil taru sane tenget/angker.

Paiketang saking pengabenan, punyan bingin ketarka pinaka cihna taru sorga ring mercapada, taru sorga wentenne ring suargan kebaos taru wreksa, kapercaya prasida ngicen napi sane ketunas. Taru puniki taler kebaos kalpataru. Tegesnyane upacara ngangget don bingin wantah sinunggil upacara ngalap don bingin, lumrahnyane megenah ring genah suci utawi pura, pacang keanggen sarana ngawi sekah utawi puspa sarira sajeroning upacara mamukur. Ngangget don bingin dumunan wawu upacara memukur. Ngangget don bingin rikala pengabenan wenten tatacara miwah prasaranannyane sane patut wenten, inggih punika : sarana tiing gading anggen tungguan (ngalap), klasa (tikeh pandan), bokoran kalih, kain kasa kanggen tatakan don bingin sane kaalap kagenahang ring tikeh klasa miwah ring bokoran, tiuk (lemat sudamala), tatopong (capil klangsah melakaran don kelapa), genjer-genjer, kulambi, umbul-umbul, miwah sane tiosan.  Samian sarana ring ajeng punika lumrahnyane kapeedang ke genah ngangget don bingin. Indik banten nyane : pejati miwah suci asoroh munggah ring surya. Banten pengresikan, luire biyekaon, durmanggala, prayascita, miwah pangulapan. Banten pokok : banten tumpeng lima asoroh, suci asoroh, sorohan asoroh, caru ayam berumbun asoroh, miwah sane lianan. Banten papendakan : canang oyodan, canang tambur kawas papendakan, lan sane lianan. Banten punika katurang, sadurung gangget don bingin kekawitan. Sane tawah sajeroning ngangget dot bingin : don bingin sareng carangnyane ulung ring tikeh klasa wenten sane melingeb miwah nengkayak.  Sane melingeb kepupulang pacang kanggen ngawi sekah lanang, sane nengkayak keanggen ngawi sekah istri.---